Akhir-akhir ani(actually batah sudah), urang sana sini becakap pasal "hamba Allah" yang rezekinya nomplok mengajut. Dimana-mana kitani bejalan,inda kira tempat keraja, urang kawin, tahlil antara tpoik yang menjadi perbualan ialah mengenai "hamba Allah" yang seurang ani.
Berkesempatan meraun rumahnya(kelurusan balik kampung), memang ku akui ia memang kaya. Kereta bejuntun, motosikal memenuhi ruang garaj rumahnya. Dan dari cerita yang kudangar( kebanyakan sumber-sumber cerita yang diragui), usinnya banyak, sampaikan nya durang, ia kan deposit duit dibank pun, bank inda mau menerima sebab telampau banyak.
Atu balum lagi masuk bisnesnya, sampai urang cerita kadai runcit pun besekuriti, gaji yang ditawarkan tinggi dan macam-macam lagi. Semua atu pun dari sumber cerita yang "syubhah".
Yang kesiannya kedia ani, menjadi bahan bualan urang ramai, biasalah ada yang puji, inda kurang jua ada yang keji, ada yang puja dan ada yang cerca. Mungkin sebab inda ramai urang melayu yang kaya macam kedia, dan inda ramai urang kaya yang pemurah macam kedia, masing-masing mempersoalkan darimana sumber rezekinya, sampaikan kudangar ada masjid yang inda mau menerima derma daripada kedia, astagfirullahalazim!!
Bagiku satu saja, rezeki masing-masing. Sekurang-kurangnya ia bulih menggurangkan kes pengangguran dibrunei dengan cara membagi urang keraja(keraja dengan titik peluh sendiri), siapalah kitani kan menentukan halal atau inda rezeki seseorang. Rasulullah SAW pun menyuruh kitani bekeraja dan mengelakkan meminta-minta.
Kalau sumber rezeki yang kitani persoalkan, bank pun banyak jua yang "curang". Dan yang paling penting lagi, kitani mempersoalkan rezeki urang, sedangkan kitani hari-hari mengumpat!!macamana tu?
No comments:
Post a Comment